Proiektu horri buruzko hausnarketa estrategikoa egitean, pentsatu genuen ez zela soilik guk Oinarrin inplementatuko genituen prozesuak eta horiek nola gauzatuko genituen erabakitzea, baizik eta materialak nork, nola eta zer baldintzatan ekoizten eta banatzen diren hausnartzea.
Gure produktuak ingurumena errespetatzen duten materialekin egin ahal izateak eta horiek egiten dituzten pertsonen eskubideak eta duintasuna sustatzeak, ilusionagarria eta aberasgarria izateaz gain, egiteko, kontsumitzeko eta bizitzeko beste modu bat ere badagoela erakusteko aukera paregabea eskaintzen digu.
TINTEI DAGOKIENEZ
Ur bidezko tintak erabiltzearen aldeko apustua egiten dugu, hori baita aukerarik ekologikoena. Plastisol-tinten kasuan ez bezala, ur-tinten kasuan ez dago plastikorik, disolbatzailerik eta PVCrik, izenak dioen bezala, urarekin eginda daude. Behin jantzian aplikatuta oihalean iragazten da, zuzenean integratuz, eta inpresioa ukitzen dugunean sortzen den sentsazioa jantziaren parte balitz bezalakoa da.
ERANTZUKIZUN EKOLOGIKOA
GOTS ziurtagiria nazioartean onartutako araudia da, eta ingurumenari kalterik egingo ez dion eta gizarte-kontzientzia ere izango duen ehun-prozesamenduaren alde egiten du. Horregatik, GOTS ziurtagiria ez da soilik ekoizpen jasangarri batean oinarritzen, baizik eta enpresa guztientzako arau eta jarraibide zorrotzak ere ezartzen ditu balio-kate osoan. GOTS etiketa duen oihal bat erantzukizun sozialarekin eta ekologikoarekin ekoiztu da.
Helburu hori lortzeko, enpresek hartu beharreko irizpide ekologikoak eta sozialak zehazten dira. Nekazaritza ekologikoko zuntzak erabiltzea, ingurumenerako kaltegarriak edo toxikoak diren substantziak baztertzea eta gutxieneko soldata bat ezartzea GOTS ziurtagiriaren nahitaezko irizpideen laburpen txiki bat baino ez dira. Arau horiek betetzen direla bermatzeko, balio-kateko enpresa guztiek in situ ikuskapen bat egin beharko dute urtero, proba independenteen institutuek egina, GOTS ziurtagiriarekin.
Informazio gehiago GOTSen webgune ofizialean aurki daiteke.
ERANTZUKIZUN ETIKOA
Jendeak axola du. Gure materialak ekoizten eta banatzen dituzten pertsonen lan baldintzak inportanteak dira. Puntu horretan, galdera hau otu zitzaigun: nola bermatu haien eskubideekiko eta duintasunarekiko errespetua? Erantzuna Fair Wear Foundation-ek eman zigun, gure produktuak haren estandarrari batu baitizkiogu.
Fair Wear Foundationek emandako estandarra, hain zuzen ere, LANEren hitzarmenetatik eta Nazio Batuen Giza Eskubideei buruzko adierazpenetik eratorritako zortzi lan-arau nagusiak errespetatu direla bermatzean oinarritzen da.
Horrek esan nahi du Fair Wear Foundationen Lan Praktiken Kodea nazioartean onartutako arauetan oinarritzen dela. Arauak negoziazioen bidez ezarri dira, eta, horien bidez, marka horrekin lotutako jantzi guztiak eskubide horiek erabat errespetatuz ekoitziko dira:
Enplegu librea, diskriminaziorik eza, haurren enplegurik eza, elkartzeko eta negoziazio kolektiborako eskubidea, soldata duina izateko eskubidea, lanaldi duina izateko eskubidea, lan-baldintzen segurtasunerako eta osasungarritasunerako eskubidea eta kontratu-harremana izateko eskubidea.